Rev 4 | MED | STEP | Wote ni kᵾn, na aldpa ur kump mel, etᵾp kundrum mel wi muⱡ kona ila keta puⱡ puⱡ ti, wei titim. Wote kona ila, pikul ik ti, unt pit ni mel ti ndi omba, nimba mel, “Nim ya ila oⱡa wana, na ndi nim kᵾn, uⱡ wote pemba mbᵾ, nim tᵾpa ora ndamba kᵾnᵾn,” nitim.

Revelation of John 4

Wi Muⱡ Kona Ila Got Nga Mbi Paka Rorung

1 Wote ni kᵾn, na aldpa ur kump mel, etᵾp kundrum mel wi muⱡ kona ila keta puⱡ puⱡ ti, wei titim. Wote kona ila, pikul ik ti, unt pit ni mel ti ndi omba, nimba mel, “Nim ya ila oⱡa wana, na ndi nim kᵾn, uⱡ wote pemba mbᵾ, nim tᵾpa ora ndamba kᵾnᵾn,” nitim. 2 Ei kᵾn, tᵾngᵾnda mint, Muⱡnga ei ndi, na kᵾn omba, ronduⱡ mundpa moⱡnga, na kᵾndᵾr mel, wi muⱡ kona ila wu nuim mumuk mbᵾ nga mormun rᵾpᵾndi pol kat titim. Pol ila, wamp ti murum. 3 Wote, wu nuim mumuk mbᵾ nga rᵾpᵾndi pol ila murum wamp ni nga kuimp keta ei, ku kai Jaspa kᵾn Karniliyan raⱡ, kiraipa muraipa etᵾm ei mel itim. Wote, wu nuim mumuk ni nga rᵾpᵾndi pol ni kᵾⱡ, kona kᵾmp kᵾpᵾm poⱡpa, tᵾpa pok etpa, ku kai Emeral mel mon mba pitim. 4 Wu nuim mumuk ni nga rᵾpᵾndi pol ni kᵾⱡ, ruk ting ila telingina, rᵾpᵾndi pol 24 kat, tepa pok itim. Wote, rᵾpᵾndi pol ni kᵾⱡ nga pol ila, rup wu 24 kat, mbuⱡ mbal kurumuⱡa mbᵾ ralk, peng nimbila wu nuim mumuk mbᵾ nga gol wᵾnᵾ nimbᵾ nga mat mondᵾk morung. 5 Wu nuim mumuk rᵾpᵾndi pol ruk ting ila telinga, kona kiraipa etpa ekit omba, wote muⱡ ik nilinga, wote guⱡ gaⱡa nimba itim. Wote, rᵾpᵾndi pol ei nga oldung orunga, ndip kiya 7 kat, kiya nomba pitim kᵾⱡ, Got nga Muⱡnga 7 kᵾⱡ morung. 6 Wote, rᵾpᵾndi pol oldung orunga ila ku, num kuta mam ni mel, kona ti titim. Mong kiraipa mel rᵾⱡang mba titim. Wote, rᵾpᵾndi pol mbuldung orung kᵾn, oldung orung kᵾn, wote wᵾng orung orung raⱡ ila, mel tᵾmbᵾkak rᵾk rᵾk kont mormun kat, mong waⱡ mbuldung orunga anggilpa, oldung orunga anggilpa, etᵾm kat morung. 7 Mel kont morum kuimp tepa ei, kui Laiyon mel kapⱡa, wote mel ti kng kau pela mel kapⱡa, wote mel ti wamp mel kuimp keta anggᵾtᵾm. Wote, mel ti kᵾi ndowa mel ei, mbur nimba etpa murum. 8 Mel tᵾmbᵾkak rᵾk rᵾk kont mormᵾn kᵾⱡ, pou 6 nimba elpa elpa ᵾnggᵾtᵾm. Wote, mong minal rukᵾr orunga ekit orunga mbᵾ anggilpa pok elinga, rumbuldi rᵾnggilmᵾ raⱡ, muⱡ ti natᵾk, kinan ei mel nᵾtmᵾn, “Ei Nuim Got Wu Ronduⱡ Wei! Wingti! Wingti! Wingti! Unt murᵾn, akup morᵾn, wote yant uin,” nᵾtᵾng.

9 Mel tᵾmbᵾkak kat rᵾk rᵾk kont mormᵾn ni kᵾⱡ ndi, rᵾpᵾndi pol ila uⱡ nga kᵾnt nga kont morum wamp ei nga, mbi ou tangga nᵾk, kinan mbᵾ nᵾndᵾk, mbi paka rondᵾk, angge nᵾk etᵾng. Ni kᵾn, rᵾp wu 24 kat ndi, uⱡ nga kᵾnt nga kont morum wamp mbᵾ, to rᵾpᵾndi pol ila morum ni nga kuimp keta ila, rumᵾⱡi pek mbi paka rondurmin. Wote, i etᵾk mel, en enim nga gol wᵾnᵾ mbᵾ, rᵾpᵾndi pol ei nga kuimp keta ila rok mundᵾk nᵾk mel, “Nim tᵾn nga Nuim Got ye! Nim nga mbi paka rundamina, mbi ou tᵾkᵾn, wote muⱡ mᵾi raⱡ nga ronduⱡ ei, tin ei nga kapⱡa etkᵾn morᵾn. Ei nambuⱡ emel, nim ndi, mel mbᵾ pora mim itᵾn. Wote ninim ndi, pᵾtᵾn ei mel, mana mel elpa elpa mbᵾ, wengᵾndkᵾn mim etkᵾn mundrᵾn ei mel, kont puk mormin,” nᵾtᵾng.